Назырбеи Смаил-иԥа Габниа.

21.07.2019

 Аԥсны Аҳәынҭқарра Аҵареи Аҭҵаарадырреи рминистрра гәалсра дула ирыдышшылоит, 65 шықәса дшырҭагылаз зыԥсҭазаара иалҵыз Аԥсны зҽаԥсазтәыз арҵаҩы Назырбеи Смаил-иԥа Габниа.

 Назырбеи Смаил-иԥа диит Гәдоуҭа араион Џьырхәа ақыҭа. Уи ихәыҷра мҩаԥысуан дахьиз, дахьааӡаз Џьырхәа ақыҭан. Ашкол даналга дҭалоит М. Горки ихьӡ зху Аҟәатәи арҵаҩратә институт арҵаҩратә факультет. Қәҿиарала даналга (1975 ш.) дцоит арратә уалԥшьа ихигарц, дагьақәшәоит Забво, Читатәи аобласт, 1976 шықәсазы далган даауеит.

 Ирҵаҩратә усура хациркуеит аҭоурых арҵаҩыс Џьырхәатәи абжьаратә школ аҟны. 1978-1983ш., Аԥсны Аҳәынҭқарратә университет аҟны аҭоурых-зинхьчаратә факультет далгоит. 1977-1981ш. – арҵареи ааӡареи русқәа азы ашкол аиҳабы ихаҭыԥуаҩыс дҟарҵоит. Уи иҿырԥшыгаз иусура иабзоураны 1981-1987ш. рзы аус иуан Џьырхәатәи ихарҭәаам абжьаратә школ адиркторс. 1987ш. рзы Џьырхәатәи абжьаратә школ – директорс дарҭоит.

 2009ш. рзы Аԥсны Ахада С.У. Багаԥшь иқәҵара инақәыршәаны ианашьоуп «Ахьӡ-Аԥша» аорден 3-аҩаӡара.

 Жьҭаарамза 3, 2018шықәсазы Аԥсны Ахада Р.Џь. Ҳаџьымба иқәҵара инақәыршәаны ихҵан аҳаҭыртә хьӡы «Аԥсны зҽаԥсазтәыз арҵаҩы» ҳәа.
 Аԥсны зҽаԥсазтәыз арҵаҩы Назырбеи Смаил-иԥа Габниа 43 шықәса ашкол иазааԥсахьаз наӡаӡа ҳгәалашәараҿы даанхоит рҵаҩык, наԥхгаҩык иаҳасабала.