Арҵаҩы – ааӡаҩ лгәаларшәаразы

17.07.2019

  Аԥсны Аҳәынҭқарра Аҵареи Аҭҵаарадырреи рминистрра гәалсра дула ирыдышшылоит, 69 шықәса дшырҭагылаз зыԥсҭазаара иалҵыз Аԥсны зҽаԥсазтәыз арҵаҩы Агница Ирадион-иԥҳа Қәычбериа-Џьӷаркаа.

   Агница Ирадион-иԥҳа данысит иуадаҩыз амҩа. Уи лхәыҷра мҩаԥысуан дахьиз, дахьааӡаз Кындыӷ, нас Аҭара. Ашкол даналга дҭалоит М. Горки ихьӡ зху Аҟәатәи арҵаҩратә институт афизика-математикатә факультет. Қәҿиарала даналга (1970 ш.) дрышьҭуеит усура Тҟәарчалҟа афизика арҵаҩыс. Лырҵаҩратә усура хацлыркуеит Тҟәарчалтәи 5-тәи абжьаратә школ аҿы. 1984 ш., арҵареи ааӡареи русқәа азы ашкол аиҳабы ихаҭыԥуаҩыс дҟарҵоит. Уи иҿырԥшыгаз лусура иалыҵшәаны 1989 ш., инаркны иахьа уажәраанӡагьы аус луан Тҟәарчал араион аҵара аҟәша инспекторс, специалист хадас, еилалыгӡон лырҵаҩреи араионаҿтәи ашколқәа русура аконтроль рзуреи.

  Агница Ирадион-иԥҳа лыԥсҭазаара зегьы зызкыз арҵаҩра акәын. Уи изызҳауаз абиԥарақәа рааӡараҿы хамеигӡарада аус луан. Зус даараӡа ҳаҭыр ззақәыз рҵаҩын, ааӡаҩын. Уи даара дреигәырӷьон, лгәы шьҭырхуан лааӡамҭацәа, даргьы ҳаҭыр ду лықәырҵон. Иахьа урҭ рахьтә жәпаҩык Аԥсны Аҳәынҭқарраҿы еиуеиԥшым аҭыԥ дуқәа ааныркылоит.

  Иԥшьоу, ҳаҭыр ду зқәу арҵаҩы изанааҭ аҿы иаалырԥшуаз алыҵшәақәа ирыбзоураны жьҭаарамза 5, 2016 ш., Аԥсны Аҳәынҭқарраҿы Ахада иусԥҟала илыхҵан аҳаҭыртә хьӡы «Аԥсны зҽаԥсазтәыз арҵаҩы» ҳәа.

   Агница Ирадион-иԥҳа наӡаӡа ҳгәалашәараҿы даанхоит рҵаҩык, ааӡаҩык, анык лаҳасабала.