Аминистр Адгәыр Какоба аҧсуа-вундеркинд Едгар Гәазаа дидикылт

06.10.2017

Цәыббрамза 6, 2017ш. Аԥсны Аҳәынҭқарра Аҵареи аҭҵарадырреи аминистрра апресс-маҵзура.©

Аԥсны аҵареи аҭҵаарадырреи рминистр Адгәыр Какоба дидикылеит А.С. Пушкин ихьӡ зху Аҟәатәи 2-тәи абжьаратәи ашкол аҵаҩы Едгар Гәазаа.

Аиԥылараҿы иалацәажәан иқәра иаҵанакуа ашколтә программа аинтерес ахьынӡа изалоу, иара убасгьы иаԥхьаҟатәи игәҭакқәа.

Аԥсуа-вундеркинд дазааҭгылеит иқәра зҵанакуа ашколтә программа дшахысхьоу, 10-11 аклассқәа рыпрограмма аҟны дшыҟоу. Иара убасгьы изеиҭаиҳәеит иреиҳау аҵараиурҭа аҭаларазы аҽазыҟаҵарақәа дшырҿу, ишимоу Урыстәылатәи аҵараиурҭақәа рнаҩсгьы, Сингапуртәи, Малазиатәи, Англиатәи иреиҳау аҵараиурҭақәа рахьынтәи ааԥхьара.

         Аминистр иазгәаиҭеит, ас еиԥш зыхдырра ҳараку, авундеркиндцәа Адунеи зегьы аҟынгьы ишырацәам, убри азы иҷыдоу ахылаԥшра шырҭаху, насгьы урҭ ирызцәырҵуа азҵаарақәа рыӡбараҟны ацхыраара аиндивудалтә ҟазшьа аҭаны ишазнеилатәу. Аминистр иҳәеит, имҩаԥысран иҟоу Аԥсны Аҳәынҭқарра Аҵареи аҭҵаарадырреи рминистрра аколлегиа аҟны, Едгар Гәазаа 11-тәи акласс ахь ииагаразы азҵаара шықәиргыло.

         Аиԥылара хыркәшо, аминистр Адгәыр Какоба аԥсуа-вундеркинд изеиӷьишьеит игәҭакқәа зегьы рынагӡараҿы аманшәалара, гәаларшәагак аҳасабала ҳамҭас ииҭеит ашәҟәы.