Ҳаҭыр зқәу Аслан Қәҭиа-иԥа!

09.07.2019

Ҳаҭыр зқәу Аслан Қәҭиа-иԥа!

 

 Аԥсны Аҳәынҭқарра Аҵареи Аҭҵаарадырреи рминистрра ахьӡала гәык-ԥсыкала ишәыдаҳныҳәалоит шәиубилеитә мшы.

  Шәара шәыруаӡәкуп, имариам аибашьрашьҭахьтәи аамҭазы аҵара аус аиҭашьақәыргылара знапы алазкыз, иҿыцу абжьгарақәеи анормативтә актқәеи ралагалара зылшаз, аспециалистцәа ҿарацәа аметодикатә цхыраара рызҭоз, абаҩрҵәыра арҵаҩцәеи атренерцәеи рзы асеминарқәа мҩаԥызгоз…

   Шәара шәыԥсҭазаараҿы аҭыԥ ду ааннакылоит изызҳауа аҿар рааӡара аус ҟазарыла азнеиреи шәнапы злаку аус ахаҭабзиара аҳаракреи. Ахәыҷы инаиркны аду иҟынӡа абаҩрҵәыреи аспорти агәыбылра дшәыркуеит. Абиԥара рааӡараҿы, реизҳазыӷьараҿы шәџьабаа ҳаракуп. Шәара ишәааӡахьеит имаҷымкәа Аԥсынра еихазҳауа, ԥхьаҟа изго аҿар. Урҭ ирылашәааӡон Аԥсадгьыл абзиабара, Аԥсуара.

     Иҟаӡам аус маҷ, зегь хадоуп, зегь ҭакԥхықәроуп. Шәызхагылоу аус шәазнеиуеит ламысла, ԥсуа ҵасла.

   Шәара шәыпрофессионализм, шәҟәыӷара, шәычҳара хәы змам малуп, иҿырԥшыгоуп ҳажәлар рлахьынҵеи уаҵәтәи рԥеиԥш хьаас измоу рзы.

   Шәара шәыхьӡ адҳәалоуп Аԥсны ахәыҷтәы спорт арҿиара. Есышықәса имҩаԥыжәгоит амилаҭтә спорт хәмаррақәа зцу Аԥсны ашколхәыҷқәа рспартакиада, арра -спорттә хәмарра «Аиааира» уҳәа уб.егь.

   Шәџьабаа ахә ҳаракны ишьо, Аԥсны Аҳәынҭқарра Ахадара, Аԥсны Аҵареи аҭҵаарадырреи рминистрра ишәанаршьахьеит ахьӡ ҳаракқәа: «Аԥсны зҽаԥсазтәыз арҵаҩы», «Аԥсны зҽаԥсазтәыз абаҩрҵәыратә культуреи аспорти рзы аусзуҩ», «Ахьӡ-аԥша» аорден III аҩаӡара, «Амилаҭтә категориа аӡбаҩ», «Ҳаҭыр зқәу аспорт азҟаза», Аԥсны амилаҭтә аолимпиатә хеидкыла алахәыла.

    Иахьагьы ааԥсарак ҟамҵакәа изызҳауа аҿар рааӡара знапы алаку, зажәеи зуси еимадоу, зҭакԥхықәра ҳараку, аԥышәа ду змоу арҵаҩы, Аслан Қәҭиа-иԥа, гәык-ԥсыкала ишәзеиӷьаҳшьоит агәабзиара, агәамч, аманшәалара, шәнапы злаку аус аҟны ақәҿиарақәа.

 

      АМИНИСТР                                                                                                                  А. П. КАКОБА