Ҳаҭыр зқәу агазеҭ «Аԥсны» аредактор хада, аредакциа аусзуҩцәа!

27.02.2019

Гәык-ԥсыкала ишәыдаҳныҳәалоит раԥхьаӡатәи агазеҭ «Аԥсны» ҭыҵижьҭеи 100 ш. аҵра.

100 шықәса агазеҭи аԥхьаҩи реимадара – ари иреиӷьу лахьынҵоуп агазеҭ азы. Уи аҭоурых – ажурналистцәа рыла иаарԥшу ҳтәыла аҭоурых ауп. Агазеҭтә ажәа – ауаажәларратә культура иасимволуп, уи агәра ргоит, иазыԥшуп аԥхьаҩцәа зегьы.

Аԥсны аҭоурых аҿы еиҳа ианыуадаҩыз, ақырҭуа меншевикцәа аҳра аныруаз аамҭазы ауп раԥхьаӡатәи аԥсуа газеҭ «Аԥсны» аҭыҵра ианалага. Уи аҭыҵра рыбзоуран гәыԥҩык аԥсуа интеллигентцәа, Аԥсны Асовет Жәлар рхаҭарнакцәа: С. Ҷанба,

М. Цагуриа, Д. Аланиа, И. Маан. Иҭыҵуа агазеҭ аԥсышәала акьыԥхь абарц азы, дара аменшевикцәа рхадара рҿаԥхьа иаартны ари азҵаара ықәдыргылон.

Раԥхьаӡатәи аԥсуа агазеҭ «Аԥсны» редактор хадас даман зыжәлар рҵарадырра хықәкы хадас измаз, амилаҭтә литература ашьаҭакҩы, Аԥсны жәлар рпоет Д.И. Гәлиа.

Агазеҭ аҭыҵрала аԥсуа сахьаркыратә литература хацыркын, аԥсуа жәлар рмилаҭтә хдырра азырҳарагьы иацхрааит.

Агазеҭ «Аԥсны» адаҟьақәа рҿы ирнылон Аԥсны астатуси, жәлар рҵарадырра аҭагылазаашьеи, жәлар рҵасқәеи рқьабзқәеи реиқәырхашьеи ирыдҳәалаз апроблемақәа ирызкыз аматериалқәа.

Ажурналистикатә жанрқәа инарымаданы, агазеҭ ианылон алитературатә ҩымҭақәеи афольклортә ҳәамҭақәеи. Лассы-лассы акьыԥхь рбон еицырдыруа аԥсуа шәҟәыҩҩцәеи апоетцәеи, С. Ҷанба, Ӡ. Дарсалиа, И. Коӷониа уҳәа авторс измоу ажәеинраалақәа, аочеркқәа, ажәабжьқәа, адраматә рҿиамҭақәа.

1919 ш. агазеҭ «Аԥсны» адаҟьақәа рҿы аԥсышәала акьыԥхь рбеит раԥхьаӡатәи

Д. Гәлиа иажәабжь «Атәым жәҩан аҵаҟа», иара убас раԥхьаӡатәи С. Ҷанба идрама «Амҳаџьыр».

Раԥхьатәи аԥсуа журналистцәа рырҿиаратә мҩа мариамызт, урҭ роуп ажурналистика ажанр ҿыцқәа алазгалазгьы. Ҳ-Аԥсназы иуадаҩыз аамҭақәа рзгьы агазеҭ «Аԥсны» ҳауаажәлар рзы иҟан ихадароу, пату змоу аинформациатә хархәаганы, иахьагьы хадара змоу ҭыжьымҭаны иаанхоит.

Ҳҳәынҭқарраҿы иҭыҵуеит имаҷымкәа зхатәы аԥхьаҩ дызмоу агазеҭқәеи ажурналқәеи. Аха агазеҭ «Аԥсны» иамоуп ахатәы шәышықәса ирҭагӡоу аҭоурых, иамоуп ахатәы традициақәа, ахатәы стиль. Иахьагьы уи амҩа иануп: ҳаамҭа иақәшәо ахҭысқәа аныԥшуеит, зусурала, баҩхатәрала, ҟазарала уҳәа, зхыԥша ҳаракхаз рыӡбахә аҳәоит. Убри акәхап, ари агазеҭ шықәсырацәалатәи аусура алыршара маӡас иаҵоугьы.

Аҳәынҭқарратә проблемақәа еилкааны, аполитикатә, аекономикатә зҵаарақәа ауаажәлар рҟынӡа инаганы, апроблемақәа рыӡбашьа азгәаҭаны аҩра – абарҭ ихадоу азнеишьақәа шәара шәгазеҭ ажурналистцәа рзанааҭтә аҩаӡара дырҵабыргуеит.

Араҟа аус руан, иахьагьы аус руеит зус бзианы издыруа апрофессионалцәа. Ҳауаажәлар рзы хәызмаӡам ацхыраара ҟашәҵон, иахьагьы шәаҿуп урҭ рыгәҭакқәа анагӡара.

Агазеҭ «Аԥсны» 100 ш. ахыҵра – ари аныҳәа аредакциа аусзуҩцәа рзы мацара акәӡам, ҳтәыла аԥеиԥш згәы иҵхо зегьы ҳзы ныҳәа дуӡӡоуп.

Ишәзеиӷьаҳшьоит агәабзиара, анасыԥ, аихьӡара дуқәа. Шәџьабаа ду азы ҳамҭа дуны ишәзыҟалааит аԥхьаҩ иҟынтә ажәа бзиақәеи хра злоу ахҳәаақәеи шәредакциазы.

Ишәыдныҳәалаз шәиубилеи!