Ҳаҭыр зқәу Аԥсны ашколхәыҷқәа, арҵаҩцәа!

01.09.2019

Гәык-ҧсыкала ишәыдысныҳәалоит Аҵарашықәс ҿыц алагамҭа, Адырра амш.

Цәыббра 1 – агәыҕра лашақәеи, агәҭакы бзиақәеи рахь иуҧхьо ныҳәоуп.

Абри амш аҽны раԥхьаӡатәи аҵәҵәабжьы гоит 1-тәи акласс ахь иааиз ахәыҷқәа рзы. Урҭ ашколтә ҧсҭазаара ҿыц ахь ршьапы еихыргоит. Ашколхәыҷқәа ибзианы аҵара рҵалароуп, адырра ҿыцқәа рҳаны рхықәкқәа рынагӡара иашьҭазароуп. Аԥсны Аҳәынҭқарра Аҵареи аҭҵаарадырреи рминистрра уи азы аринахысгьы алшарақәа рзаҧнаҵалоит.

         Ари амш аҽны гәахәарыла срыдныҳәалоит акыр иаҧсоу абиԥара рааӡара знапы алаку арҵаҩцәа. Иахьа ахәыҷқәа аус рыдулара зыҧсҭазаара ҵакыс иаиуз ҳара ҳарҵаҩцәа ирыдыркылоит адныҳәаларақәа. Имариам, аҭакҧхықәра зцу арҵаҩцәа рус аҿы гәык-ҧсыкала ирзеиӷьасшьар сҭахуп аихьӡарақәа, аҵаҩцәа рыбзиабареи, раҳаҭырқәҵареи. Ишәдыруазар сҭахуп, атәыла анапхгара арҵаҩы изаанаҭ аҳаҭыр ашьҭыхразы, арҵаҩы иусураҿы аҭагылазаашьа аиӷьтәразы ирылшо зегьы шыҟарҵало аринахысгьы. Аҵарадырра змоу роуп аҳәынҭқарра зыргыло, ԥхьаҟа изго.

Ҳаҭыр зқәу Аԥсны ашколхәыҷқәа, арҵаҩцәа! Ишәзеиҕьасшьоит агәабзиара, адырра ҿыцқәа раиураҟны агәазыҳәара ду, аманшәалара.

Шәырҵаҩцәа рааҧсара шәаҧсахааит.

Мҩамш адыррақәа раҳаракырахь!

Аминистр                                                                       А. П. Какоба