Лыԥсҭазаара далҵит, арҵаҩы, ааӡаҩ, аметодист, апатриот ду – Абыхәба Бабуца Арсен-иԥҳа.

Аԥсны Аҳәынҭқарра Аҵареи аҭҵаарадырреи рминистрра гәалсра дула ирыдышшылоит, зыԥсҭазаара иалҵыз арҵаҩы, ааӡаҩ, аметодист, апатриот ду – Абыхәба Бабуца Арсен-иԥҳа лҭаацәеи лгәакьацәеи. Уи лыԥсҭазаара зегьы азылкит, хамеигӡарадагьы амаҵ азылуит аҵареи ааӡареи рус. Ԥсабарала ирҵаҩыз, иԥсихологыз, зырҵаҩратә занааҭ гәык-ԥсыкала иазнеиуаз, ԥсуаҵасла, ламысла, зыԥсҭазаара мҩаԥызгаз рҵаҩын Бабуца Арсен-иԥҳа.

Аџьабаа ду лбахьан Тҟәарчалтәи 1-тәи абжь. ашкол аҟны. Ган рацәала дазнеиуан аҵареи ааӡареи апроцесс. Лара лзын дыҟамызт ахәыҷы цәгьа. Аҵара зҵоз дизҿлымҳан, аҟазара злаз дӡырылгон, ахәыҷы иԥсихологиа, идунеихәаԥшышьа даараӡа дазааигәан, деилылкаауан. Аҿар рааӡара, адырра рыҭара, рхаҭара ашьақәыргылара, амҩа иаша рықәҵара – ԥсабарала баҩхатәраҵас илылан.

Бабуца Арсен-иԥҳа лбаҩхатәреи, лус азнеишьеи азгәаҭаны диаргоит Аҟәаҟа аҭҵаарадырратә-педагогикатә журнал «Ашколи аԥсҭазаареи» аредакциахь. Актәи амшқәа инадыркны аибашьра ҟалаанӡа, ааԥсарак ҟамҵакәа ажурнал амаҵ азылуан. Аԥышәа ду змоу рҵаҩык иаҳасабала лусура ацылҵон 10-тәи Ашьхарыуаа рышкол аҟны, ААУ аҟны даԥхьон ахәыҷтәы литература. Илымаз лыпрофессионалтә ԥсҭазааратә ԥышәеи, лҟәыӷареи – лколлегацәеи лҵаҩцәеи ирымалдон.

Лгәамбзиара иахҟьаны аибашьра ашьҭахь кыраамҭа даанхоит Москва ақалақь аҟны. Уаҟагьы тәамҩахә лымамызт, уи лара илҟазшьан. Амҽышатәи ашкол ҳәа изышьҭоу еиҿызкааз дыруаӡәкуп. Москва инхоз аԥсуаа рхәыҷқәа аԥсшәа длырҵон. Еиҿылкаауан ахәылԥазқәа, аиубилеиқәа, имҩаԥылгон иаарту аурокқәа. Аҳәыҷқәа рхатәы бызшәа агәыбылра дыркреи, рыԥсадгьыл абзиабара рылааӡареи аус аҟны илылшаз даараӡа ирацәоуп. Имаҷҩым лажәа ҟәыӷа амҩа иаша иқәнаҵаз. Убри азы акәхап иахьа гәыблыла дзыргәалашәо лҵаҩцәа, арҵаҩцәа, бзиа дызбо зегьы.

Рҵаҩык, ааӡаҩык иаҳасаб ала еихалҳаз ахьӡ ҿырԥшыганы иаанхоит изызҳауа аҿар рзы, лыжәлар рзы.

Лоушьҭымҭацәа, лааӡамҭацәа аӡәырҩы иахьа еицырдыруа, еиуеиԥшым азанааҭқәа рыманы аус руеит, амаҵурақәа ирхагылоуп Аԥсни Урыстәылеи.

Бабуца Арсен-иԥҳа инлыжьит имыцәаӡо лашарак абзиабара ду зцу лааӡамҭацәа ргәаҿы – ари хәу змам малуп.